OLERKIAK

5. mailako Aitziber, Alba, Celia, Alazne eta Aroa liburutagian egon ziren beste egunean eta irakurri zituzten olerki batzuk. Hauek izan ziren gehien gustatu zitzaienak:

AMETSETAKO URA
Ura telefonoan zure ahotsa
edalontzi bat dago mesillan
hari begira hartu nahi loak
ohea urak hartzen du
kamisoia blai, banoa itsasargi baten pareraino
non zu zauden, niri mail bat idazten.
Begiak ireki ditut.
Eskua luzatu dut.
Edalontzia jausi da.
Kristalak zoruan zure izena dinoste.
Bustita esnatu naiz.

BASAMORTUAK ETA ESTOLDAK

Emakume ortosik arrakala artean.

Semea lotan bizkarrean

euliak begietan.

Emakumea berbetan

ezagutzen ez duen jainko batekin.

Jainkoak diotso txit maite duela.

Teilatuak eta helikopteroa

jitoa

hogeita hamazortzi gradu

zaporea

ur eztarria 

ur hestea

argazkin oinak

errepikapenak

URA LEHEN ISPILUA

Dardara bat ur beltzean

itzalak ihesi doaz

erloju bat jaio da

ama ura, menstruazio-odola-

URAREN DENBORA

Hodeia, izotza, xirripa, turrusta, olatua, lainoa, istila.
Uraren hizkuntza.
Sustraia, ihia, goroldioa, iratzea, lorea, nenufarea, alga.
Uraren hizki-mizkia.
Larba, txoria, tximeleta, inurria, otsoa, arraina, gizakia.
Uraren ideia.
Odola, gernua, hazia, amniosa, izerdia, malkoa, adurra.
Uraren hieroglofikoa.

Miren Agur Meabe

LURRA

Lur nintzen, lurtuz noa

zugan bat egin arte,

zurekin behin-betiko

ezkontzen naizen arte.

URA

Iturritik irten

eta maldan behera

nolabait dihoan

ur-hari epela

naizela dirudit

inondikan ere.

Uraren galtzeko

arriskuak zenbat

diraukeenik inork

inolaz ez daki,

asma-ezin hainbat

dira izan ere.

AIREA

Mun eta musu, beratu dute

aingeruen bihotza

hodeiek gaur ez diote gezurrik;

jo dute gudarako hotsa;

hostots lehorrak igaro ohi dira

bilatuz herri harrotza;

baina aurpegian zirrara sartuz

heldu da egurats hotza.

Mikel Arregi